Aðventa

Þetta lítur út fyrir að ætla að verða besti desembermánuður sem ég hef lifað árum saman. Depurðin, kvíðinn og leiðinn sem hafa iðulega fyllt mig í þessum mánuði á undanförnum árum lætur lítið á sér kræla. Myrkrið þrúgar mig ekki neitt, en stundum hefur það jafnvel farið svo í mig að ég hef fundið fyrir köfnunartilfinningu. Í fyrra var ég óendanlega þreytt og svaf mest allan mánuðinn, enda nýlega búin að skipta um lyf, nýhætt að vinna og var að vinna upp það sem heilsan hafði farið niður á við á þeim tíma sem leið frá því að gamla lyfið (Tamoxifen) hætti að virka og ég byrjaði á því nýja (Femar).
Í dag er þetta allt annað líf, myrkrið er bara notalegt og við hjúin notum það til að kúra við sjónvarpið og undir sæng, ég og ástin í lífi mínu, sem ég fann svo seint. Það besta sem fyrir mig hefur komið er að hitta hann Óskar minn, fyrir utan að eignast strákana mína. Sem ég heyri nú reyndar ekkert alltof oft í, þeir lifa sínu lífi og ég mínu. Ég er alveg sátt við það, það er bara gott að þeir þurfa ekki meira á múttu gömlu að halda og geta staðið á eigin fótum, og ég veit að þetta eru góðir strákar.
Ég potast við það þessa dagana að laga til hér í íbúðinni, aðallega í stofunni, ganga frá bókum og dóti sem geymt er í kössum sem standa hér úti í horni. Því þó íbúðin sé mjög góð og leigan hagstæð, þá er hún full lítil og vantar algjörlega geymslupláss, og eldhúsið mætti alveg að ósekju vera stærra líka, það er eiginlega það sem bretinn kallar "kitchenette". Gæti alveg þegið að hafa einu herbergi fleira undir "dótið" mitt, eða góða geymslu, og svo stærra eldhús. Þessi íbúð er sem sagt svo lítil, að það er enginn staður í henni þar sem hægt er að moka drasli inn, loka og segja bless; allt verður að eiga sinn stað! En samt sem áður er þetta mjög gott og verður betra þegar ég verð búin að raða þessu öllu aðeins betur. Búin að fara með eitt og annað nú þegar í Sorpu og Rauða Kross gámana og á eftir að fara með meira, hef líka stoppað við í því að draga heim dót úr Góða Hirðinum, svo þetta er nú allt í áttina. Og svo er ég nú aðeins búin að kíkja ofan í "jóladótakassana" og draga upp úr þeim smávegis af skrauti, til dæmis "Gyðingaljósið" mitt, svona til að vera eins og hinir, og það lífgar líka óneitanlega upp á í glugganum, og aðventukransinn, svo þetta er bara allt mjög gaman.
Verð að segja að sjónvarpsþættirnir "Allt í drasli" eru mjög góðir að því leyti að þeir eru manni viss hvatning í tiltektinni!